പാച്ചുവിന് അഭിനന്ദങ്ങൾ

സുഹൃത്തുക്കളെ,

ഒരു സന്തോഷ വാർത്ത പങ്കുവയ്ക്കാനാണ് ഈ പോസ്റ്റ്.  പാച്ചു എന്ന ബ്ലോഗർ ഐ.ഡിയിൽ മലയാളം ബ്ലോഗിൽ സജീവമായി പ്രവർത്തിക്കുന്ന ശ്രീ ഫൈസൽ മുഹമ്മദിന് കേരള ലളിത കലാ അക്കാദമിയുടെ ഈ വർഷത്തെ കലാ പുരസ്കാരങ്ങളിൽ ഫോട്ടോഗ്രാഫി വിഭാഗത്തിൽ അവാർഡ് ലഭിച്ചിരിക്കുന്നു. അദ്ദേഹത്തിന്റെ ബ്ലോഗിൽ പ്രസിദ്ധീകരിച്ച “സർപ്പദോഷം” എന്ന ചിത്രത്തിനാണ് അവാർഡ്. 

ബ്ലോഗ് എന്ന മാധ്യമത്തിന് വേണ്ടി മാത്രമാണ് കഴിഞ്ഞ ഒരു വർഷമായി അദ്ദേഹം ഫോട്ടോഗ്രാഫുകൾ പകർത്തുന്നത് എന്ന് പാച്ചു പറയുന്നു. ആ മാധ്യമം തന്നെ അദ്ദേഹത്തെ ഈ  പുരസ്കാരത്തിലേക്കെത്തിച്ചു എന്നത് ഫോട്ടോബ്ലോഗർമാർക്കെല്ലാവർക്കും അഭിമാനിക്കാവുന്ന നേട്ടമാണ്. ഫൈസലിന്റെ ബ്ലോഗിലെ എല്ലാ ഫോട്ടോഫീച്ചറുകളും വളരെ വിലപ്പെട്ടവയാണ് എന്നതിൽ സംശയമില്ല. ഓരോ ഫോട്ടോഫീച്ചറിനു പിന്നിലും അദ്ദേഹം ചെലവഴിക്കുന്ന സമയവും അധ്വാനവും അഭിന്ദനാർഹമാണ്. ഈ അവസരത്തിൽ ഫോട്ടോക്ലബ്ബിലെ അംഗമായ പാച്ചുവിന് എല്ലാ ക്ലബ് അംഗങ്ങളുടെയും പേരിൽ ആശംസകൾ നേരുന്നു.

ഫെബ്രുവരി 13 ന് 12.00 മണിക്ക് എറണാംകുളം ദർബാർ ഹാളിൽ നടക്കുന്ന ചടങ്ങിൽ ബഹു. സാംസ്കാരിക വകുപ്പു മന്ത്രി. എം.എ. ബേബി പുരസ്കാരം വിതരണം ചെയ്യും.

അവാർഡു ലഭിച്ച ചിത്രം ഇവിടെ. അതിന്റെ ഫോട്ടോ ഫീച്ചർ ഇവിടെ.

Posted in: ചിത്രങ്ങള്‍